Antoine Cassar – Erbgħin Jum – Jum I

Erbgħin Jum – Jum I
Antoine Cassar

Immiddu l-ewwel pass f’dil-penitenza,
jien u dan ġismi jfur bi ħtijiet qodma.
Erbgħin jum, għaxart elef pass kull għodwa
sa tmiem is-sena, jew sakemm ninfena.

L-ewwel pass, it-tieni pass — kull pass qabża
tiskansa l-waqgħa bla tarf li hemm tissajja
f’kull ħofra tiddieħaq b’nejbiet imġewħa
skjerati tul il-mogħdijiet imserrpa
tal-mappa mgħaffġa kobba tal-passat.
It-tielet pass, ir-raba’ — kull pass eħfef
minn ta’ qablu, jistieden ta’ warajh,
il-pali ta’ saqajja jħossu l-qiegħa,
jinsew li mixjin fuq ħabel stirat.
Il-ħames, is-sitt, is-seba’ — sa nitlef
l-għadd tal-iħirsa li tbiegħdu warajja,
sa sidri jibqa’ għaddej ħafif daqs l-arja.

Irrid l-irxiex fil-fdalijiet ta’ xagħri,
irrid l-għaraq nieżel m’għonqi u spallejja,
magħmudija tlaħlaħli l-ittri t’ismi.
Irrid is-sħana tal-barżakka f’dahri,
irrid id-demm ibaqbaq tul riġlejja,
ħuġġieġa ssaffili d-dnubiet ta’ ġismi.

Erbgħin jum, għaxart elef pass kull għodwa,
lejn ebda par dirgħajn għajr dawk tax-xefaq,
lejn ebda par xufftejn għajr dawk taż-żiffa,
lejn ebda sider sħun għajr dak tax-xemx.

Erbgħin għodwa mil-lum sa tmiem is-sena,
ħa nindem minn kull għelt, niskonġra l-biża’,
nerġa’ nifrex il-mappa, inġibha f’postha,
f’tarf il-ħabel nerġa’ niddritta l-boxxla
’mbagħad jew inkompli għal triqti, jew ninfena.

Minn Erbgħin Jum.
Ede Books, 2017.
© Antoine Cassar. Kull jedd miżmum.

---